નવસારી: સી. આર. પાટીલના હસ્તે સ્ટીલની આધુનિક લારીઓનું વિતરણ
નવસારી શહેરમાં લારીઓ ચલાવી ગુજરાન ચલાવતા નાના વેપારીઓ અને ફેરિયાઓ માટે એક વિશેષ પહેલ હાથ ધરવામાં આવી છે. ભાજપ પ્રદેશ અધ્યક્ષ અને સાંસદ સી. આર. પાટીલે આજે નવસારીમાં લારીધારકોને સ્ટીલની નવી આધુનિક લારીઓનું વિતરણ કર્યું હતું.
સી. આર. પાટીલે જણાવ્યું હતું કે વડાપ્રધાન નરેન્દ્ર મોદી જ્યારે નવસારી કાર્યાલયના લોકાર્પણ પ્રસંગે આવ્યા હતા, ત્યારે જિલ્લા ભાજપ દ્વારા એક સંકલ્પ લેવાયો હતો કે નવસારીમાં અલગ-અલગ ડિઝાઇન અને જૂની લારીઓની જગ્યાએ તમામ લારીધારકોને એકસરખી સ્ટીલ બોડીની હાઈજીનિક લારીઓ આપવામાં આવે.
આ ઉપરાંત, બેંક ઓફ બરોડાના સહયોગથી મેયર દ્વારા વધુ 100 લારીઓ આપવાનું પણ આયોજન કરવામાં આવ્યું છે.
PM સ્વનિધિ યોજના હેઠળ મળશે લોન
નાના લારીધારકોને કોઈ બહારથી ઊંચા વ્યાજે કે પઠાણી વ્યાજે નાણાં ન લેવા પડે તે માટે વડાપ્રધાન સ્વનિધિ યોજના હેઠળ ₹15,000, ₹25,000 થી લઈને ₹50,000 સુધીની સરળ લોન અપાવવા ફોર્મ ભરાવી પ્રક્રિયા હાથ ધરવામાં આવી છે. આ માટે તેમણે વડાપ્રધાન નરેન્દ્ર મોદીનો આભાર વ્યક્ત કર્યો હતો.
