નવસારી જિલ્લામાં ચાઈનીઝ તુક્કલ, ચાઈનીઝ માંઝા સહિતની પ્રતિબંધિત સાધનસામગ્રીના ઉત્પાદન-વેચાણ-સંગ્રહ પર પ્રતિબંધ
દિવાળી અને ઉત્તરાયણના તહેવારોને ધ્યાને લઈ નવસારી જિલ્લામાં પ્રતિબંધિત સાધનસામગ્રી અંગે જાહેરનામું આગામી દિવાળી તથા ઉત્તરાયણના તહેવારો દરમિયાન વ્યક્તિ , પશુ-પક્ષીઓના જીવનને નુકસાન તથા જાનનું જોખમ ન સર્જાય તે હેતુથી અધિક જિલ્લા મેજીસ્ટ્રેટ શ્રી જે. એન. લિખિયાએ ભારતીય નાગરિક સુરક્ષા સંહિતા, ૨૦૨૩ની કલમ-૧૬૩ હેઠળ નવસારી જિલ્લાના સમગ્ર વિસ્તારમાં પ્રતિબંધિત સાધનસામગ્રી અંગે જાહેરનામું બહાર પાડ્યું છે.
જે અન્વયે તાત્કાલિક અસરથી આગામી તા.૦૧/૧૨/૨૦૨૬ સુધી ચાઈનીઝ માંઝા, ગ્લાસ કોટેડ દોરી, સિન્થેટિક/પ્લાસ્ટિક દોરી, નાયલોન દોરી તેમજ ચાઈનીઝ તુક્કલ, લેન્ટર્ન અને સ્કાય લેન્ટર્નનું ઉત્પાદન, વેચાણ, સંગ્રહ અને ઉપયોગ કરવા પર પ્રતિબંધ ફરમાવવામાં આવ્યો છે.
આ ઉપરાંત જાહેર માર્ગો, ફૂટપાથ કે જોખમી ધાબા પરથી પતંગ ઉડાડવા, જાહેર જનતાને ત્રાસ થાય તે રીતે મોટા અવાજે લાઉડસ્પીકર વગાડવા, ઉશ્કેરણીજનક લખાણવાળી પતંગ ઉડાડવા તથા કપાયેલા પતંગ-દોરી મેળવવા જોખમી રીતે રસ્તાઓ પર દોડાદોડી કરવા પર પણ પ્રતિબંધ મૂકવામાં આવ્યો છે.
