ગેરકાયદેસર તમંચાના કેસમાં આરોપી પ્રકાશ આવાસીયા નિર્દોષ જાહેર થયો વિજલપોર રેવાનગર વિસ્તારમાંથી વર્ષ 2018માં ત્રણ દેશી હાથબનાવટના તમંચા અને જીવતા કારતુસ સાથે પકડાયેલા આરોપી પ્રકાશ ઉર્ફે પ્રિતમ ડુંગરીયા આવાસીયાને નવસારીની એડીશનલ ચીફ જ્યુડિશ્યિલ મેજીસ્ટ્રેટ કોર્ટે શંકાનો લાભ આપી નિર્દોષ છોડી મૂકવાનો હુકમ કર્યો છે.
પોલીસની ફરિયાદ મુજબ, આરોપી ગેરકાયદેસર હથિયારો વેચવા માટે મધ્યપ્રદેશથી લાયસન્સ વગર લાવ્યો હતો.આ કેસમાંઆરોપી તરફેના વિદ્વાન વકીલ શ્રી વાય. ડી. બચ્છાવે (યતિષ ડી. બચ્છાવ) કોર્ટમાં દલીલ કરી હતી કે આરોપી તદ્દન નિર્દોષ છે. તેની પાસેથી કોઈ હથિયાર કે ગેરકાયદેસર મુદ્દામાલ મળી આવ્યો નથી. પોલીસે બીનવારસી હથિયાર કબજે કરીને આરોપી પર તદ્દન ખોટો કેસ કર્યો છે. આ ઉપરાંત, કેસના સ્વતંત્ર પંચ સાહેદોએ પણ પોલીસની વાર્તાને કોઈ સમર્થન આપ્યું નથી. કોર્ટે ચુકાદામાં નોંધ્યું કે કેસના મુખ્ય પંચ સાહેદોએ પોલીસની કાર્યવાહીને સમર્થન આપ્યું નથી. તેમજ પોલીસ સાહેદોની જુબાનીઓમાં પંચોને બોલાવવા બાબતે અને વાહનોના ઉપયોગ અંગે ગંભીર વિરોધાભાસ જોવા મળ્યો છે. આ જાહેર અને વસ્તીવાળા વિસ્તારમાં કોઈ સ્વતંત્ર સ્થાનીક સાક્ષી રાખવામાં આવ્યા નહોતા. જેથી કેસ ‘બીયોન્ડ રીઝનેબલ ડાઉટ’ સાબિત ન થતાં, જજ પી. કે. રાઈ (પ્રભાકર કૃષ્ણકાંત રાય) એ આરોપીને આર્મ્સ એક્ટની કલમોમાંથી મુક્ત કરવાનો આખરી હુકમ કર્યો હતો.
