નવસારીને પરિવહનની બેવડી ભેટ: ૭ વર્ષ બાદ વલસાડ-સુરત મેમુ ટ્રેન પુનઃ શરૂ, ૧કરોડ 82 લાખ ખર્ચે બનેલા સિટી બસ પોર્ટનું લોકાર્પણ
દક્ષિણ ગુજરાત અને નવસારીના મુસાફરો માટે આજે રાહતના મોટા સમાચાર સામે આવ્યા છે. સ્થાનિક સ્તરે અને રેલવે કનેક્ટિવિટી ક્ષેત્રે શહેરીજનોને પરિવહનની બેવડી ભેટ મળી છે.
મેમુ ટ્રેન ફરી શરૂ કરવામાં આવી કોરોના કાળથી બંધ પડેલી વલસાડ-સુરત મેમુ ટ્રેનને લોકોની લાંબા સમયની માંગ બાદ પુનઃ શરૂ કરવામાં આવી છે. આ ટ્રેન દોડતી થતાં સુરત-વલસાડ વચ્ચે રોજેરોજ અપડાઉન કરતા હજારો દૈનિક મુસાફરોને મોટી રાહત મળશે. આ સાથે જ નવસારી રેલવે સ્ટેશનના આધુનિકીકરણની પણ જાહેરાત કરાઈ છે.
નવસારી રેલવે સ્ટેશન નજીક મહાનગરપાલિકા અને રાજ્ય સરકારના સહયોગથી ૧કરોડ 82 લાખના ખર્ચે તૈયાર થયેલા આધુનિક સિટી બસ પોર્ટનું ઉદ્ઘાટન કરવામાં આવ્યું છે.
આ સેવા હેઠળ ૨૦ જેટલી મિની સિટી બસો આસપાસના ૧૫ કિમી વિસ્તારમાં રાહતદરે સેવા આપશે. બસ પોર્ટ ખાતે મુસાફરો માટે વેઇટિંગ એરિયા સહિતની સુવિધાઓ ઊભી કરાઈ છે.
આ દરમિયાન સયાજીરાવ ગાયકવાડની પ્રતિમાનું પણ સન્માનભેર પુનઃ સ્થાપન કરવામાં આવ્યું હતું.
કેન્દ્રીય મંત્રી સી.આર.પાટીલ, કેબિનેટ મંત્રી નરેશ પટેલ અને ધારાસભ્ય રાકેશ દેસાઈની ઉપસ્થિતિમાં આ વિકાસ કાર્યોનું લોકાર્પણ સંપન્ન થયું હતું.
